السفير معاويه التوم ينعي نعناعة القلوب

بعض وفاء فى فقيدة الاعلام والصحافة والإنسانية الاخت الغالية نعمات حمود

تبكيك المنصات والإمارات جملة
وتنعيك الوسائط فى معان مكتملة
فقدك جد صعيب ادمى قلوبا خملة
وسودتي الفضاءات كنت راية وشملة
…..
خبرك يا نعوم ملأ الفيافي سواد
وفقدك يا نعوم ترك الوراكي رماد
نعناعة القلوب الحية ست مشهاد
هملتي المنصات الكل علاهو حداد
…….
فقدك يا نعوم بالجد نزول الصاقعة
وسهمك يا نعوم ما بنقدر سور راتعة
فى طيبة الوداد نعمه المساحة الواسعة
يقبلك الكريم وفى الجنة خيلك راتعة
…….
فرقك بت حمود صاب الجميع بالغم
وخبرك فى القلوب زى الهشيم واعم
ادميتى العيون و قيل فيك حالي النم
مرقدك النعيم والروضة حافة نعم
……
نعمات بت حمود الكل بيبكى حزين
والبعرف نعوم بيكتب بدمع سخين
سلطانة المجالس كم كنت ركن ركين
فارقت الديار إعلامنا كيفو الحين
……
الله من نعوم فقد الشباب الحارق
والله عليك نعوم دمت نورك شارق
مجبولة الكرم ات ايديك برها طارق
اجرك عند كبير يقبل صنيعك بارق
…..
نعمات بت حمود عز الكلام ونوارس
فارقتي الحبايب وكنت حلة وفارس
يا زينة العقول نضمك ملاذنا الحارس
يقبلك الاله عنده ويكفيك حرا غارس
……
الله على نعوم فقد الضمير الحي
ونعماك بت حمود نبع الكرم والشي
مثلت الوطن وفرشتي دارك سي
واسرت العقول يا الملكة كلك ضي
…..
يا فخر البنات نعمات طريقا براهو
كنت محط عيون بالخوة جد راوياهو
نعناعة الثقافة تاج فخار كساياهو
قبرك يضوي نور دعوات صدق بارياهو
…..
سهمك يا نعوم فى المحنة وسير
ونبلك يا نعوم فى قلوبنا باق نمير
فى الاخلاص مسيرتك خاتيه للتقصير
ونعماك فى المواقف كنت كنز وجبير
……
نعمات لى النجاح شقت طريقا قاسية
ونعمات فى الاخوة بردة وخيوطا كاسية
نعمات ست رواح جامع الخلاف والعاصية
ليك الجنة عزوة وسبل المغافر الراسية
…..
يا حليلك نعوم فى الابتسامة العالية
ونعمات الضحوك نسم القلوب الغالية
نعمات ليك تجامل فى الليالي البالية
ونعمات سر طريق ما بتفارق الحالية
……
كيف انعيك نعوم يا طبيقة العشرة
يبقى الجرح غاير والقلوب منكسرة
ألمك والفراق خلى الجميع فى حسرة
واجرك والثواب تلقيهو فى يوم عسرة
…..
انا لله وانا اليه راجعون
السفير.د معاوية التوم
٣١ اغسطس ٢٠٢٢م

التعليقات مغلقة.